Suliffissaaleqineq suliffeqarnermilu pissutsit pillugit kisitsisitigut paasissutissat suliarineqarneri nalunaarsuinermilu periutsit

ILO-p naatsorsueqqissaarnermut allaffianit periutsit nassuiaasiorneqarlutillu maleruagassiorneqarsimasut tunngaviginerullugit nalunaarsuisoqarpoq. Paasissutissat pigineqartut apeqqutaallutik nunani tamalaani periutsit malinneqartarput.

ILO-mit piumasaqaatigineqarput inuk suliffissaaleqisutut taaneqassappat ataatsikkut pingasunik eqquutsitsissasoq. ILO-p suliffissaaleqisoq pillugu nassuiaataani, suliffissaaleqisoq tassaavoq piffissami pineqartumi:

1. suliffeqanngitsoq,

2. suliffissarsiortutut nalunaarsimasoq aamma

3. sulinissamut piareersimasoq.

Piffissap pineqartup sivisussusissaa iluamik aalajangerneqarsimanngilaq, kisianni innersuussutigineqarpoq sivisuallaassanngitsoq, assersuutigalugu ulloq ataaseq imaluunniit sapaatip akunnera ataaseq. ILO-mit aamma innersuussutigineqarpoq sulisinnaasut eqqarsaatigalugit ukiukinnerpaaffeqarnissaat, nunami pissutsit tunngavigalugit suliffissaaleqisutut nalunaarutigineqarsimasut taakkununnga ilaapput. Akerlianilli ukioqqortunerpaaffissamik innersuussisoqartoqarsimanngilaq.

Paasissutissat allaffissornermik tunngaveqarluni suliaammata ILO-mit suliffissaaleqinermut piumasaqaatit malinneqanngillat. Taamaattumik paasissutissat suliarinerini, ILO-mit innersuussutigineqartut sapinngisaq tamaat eqqortinniarlugit, nassuiaatip nalimmassarnissaa pisariaqarsimavoq. Paasissutissat suliarinerini qaammammi pineqartumi suliffissaaleqisunut nassuiaatit uku piumasaqaatigineqarput. Inuk qaammammi pineqartumi:

1. suliffissaarsiuussisarfimmut suliffissarsiortutut nalunaarsimasaaq aamma

2. sulinerit pillugit nalunaarsuiffimmi suliffeqartutut nalunaarsimanngilaq.

Suliffeqarnermi pissutsit pillugit kisitsisitigut paasissutissat ataqatigiissaarniarlugit suliffissaaleqisut aamma sulisartut ukiup pineqartup naanerani 14-nik ukioqalernikuussimanissaannik killilerneqarsimapput. Suliffissaaleqisutut nalunaarutigineqarsimasut 18-it inorlugit ukiullit aamma 64-it sinnerlugit ukiullit immikkut mianerisariaapput taakkuummata aningaasat eqqarsatigalugit pisariaqartitsinngitsut suliffissaaleqisutut nalunaarnissaminnut, 18-it inorlugit ukiullit aamma 64-it sinnerlugit ukiullit ikittuinnaat suliffissaaleqisutut nalunaartarput. Tamanna pissutigalugu Naatsorsueqqissaartarfimmit 18-niit 64-nut ukiullit kisimik suliffissaaleqisutut nalunaarutigineqartarput. Misissueqqissaarnermi assigiiaannik tunngaveqarnissaq aamma ataqatigiissumik sulinerit pillugit kisitsisitigut paasissutissanik peqarnissaq anguniarlugu, innuttaasut najugaqavissut akornanni suliffissaaleqisut kisimiitsillugit nalunaarsorneqartarnissaat aalajangiunneqarsimavoq. Nunaqavissut tassaallutik inuit ukiup naatsorsuiffiusup aallartinnerani naaneranilu Kalaallit Nunaanni najugaqarsimasut.

ILO malillugu sulisinnaasut tassaapput innuttaasut akornanni sulisartut imaluunniit suliffissaaleqisut. Naatsorsueqqissaartarfimmit aaliangiunneqarpoq qaammammi aaliangersimasumi sulisinnaasut tassaassasut najugaqavissut ukiup pineqartup naanerani 14-it sinnerlugit ukiullit, sulinerit pillugit nalunaarsuiffimmi sulisutut nalunaarutigineqarsimasut imaluunniit suliffissaaleqineq pillugu nalunaarsuiffimmi suliffissaaleqisutut nalunaarutigineqarsimasut.

Ajunnginnerusumik malitassaqarnissaq anguniarlugu sulisinnaasut nalunaarsornerinut inuit nammineerlutik nalunaarsugai malillugit suliffeqarsimasutut ilimanaatillit sulisinnaasut pillugit paasissutissanut ilanngunneqarsimapput, akissarsiat inunnut attuummassutilerneqarsinnaanngitsut pillugit sulinerit nalunaarsuiffimmi ajornartorsiuteqarneq pissutaalluni. Sulinerit nalunaarsorneqarneranni ajornartorsiuteqarneq pissutaalluni aningaasarsiat inunnut attuumassuserneqarsinnaanngitsut aamma ajornartorsiutitaqarput. Paasissutissat pineqartut isertitanut nalunaarsuifimmit pissarsiarineqarput. Sulisinnaasunut nalunaarsuiffik 2010 taamaallaat angullugu isertitanut nalunaarsuiffimmut nalunaarsorneqarsimapput, taamaattumik 2010-mi kisitsisit missingersuutaannapput. 2011-mi sulinerit nalunaarsorsimanngitsut missingersornat 2010-mit tigusaapput.

Suliffissaaleqisunut nalunaarsuiffik aamma sulisinnaasunut nalunaarsuiffik suliffeqarneq pillugu paasissutissat saniatigut inunnut paasissutissanik pingaarutilinnik imaqarput.  Paasissutissat pineqartut tassaapput inuup ukioqqortussusaa, suiaassusaa aamma sumi inunngorsimasuunera, paasissutissat taakku Naatsorsueqqissaartarfiup innuttaasut pillugit allattuiffianit ukiup pineqartup naanerani nalunaarutinit pineqartarput. Suliffissaaleqisoq nalunaarutigineqartarpoq najugaqarfiani, suliffissaaleqisutut nalunaarnermi sumiiffiup najugaqarfik assigisariaqanngilaa.